無間山寨

無間三友的故事

2008-01-24T12:14:00.000+08:00

話說無間三條友，一入山寨唔願走；
皆因寨內好優悠，食完飯仲可以抖；
仲有一大班禽獸，表演鬧交面皮厚。
當家本身唔食牛，偏偏愛上舔豬油；
大件肥膏送埋口，食完仲嫌唔夠喉；
大家笑佢唔知醜，佢話你都戇狗狗。
時間係咁走呀走，三友覺得係時候；
拎起三支大啤酒，立誓走得就好走！
點知當家好記仇，來一招先斬後奏；
先殺六叔同隻狗，再迫五哥自己走。
七仔見狀都想溜，日日求職信亂投；
奈何實力不足夠，失諸交臂獨自愁；
好彩識到個幫手，帶我逃離這魔咒；
從此三友各自走，不過依然手牽手；
承諾過從今以後，不再生活無厘頭；
努力向著目標走，他朝相約論成就！

講股順口溜

2008-01-23T14:07:00.000+08:00

尋日一跌二千點，幾乎慘將細佬剪；
成副身家扁晒值，疴尿變成一滴滴；
四叔講左要小心，但係又話有信心；
佢個仔仔話預左，兩仔爺去賣生果；
到底依家跟唔跟，市民個個好擔心；
美國正步入衰退，問你夠唔夠膽追；
都話抄賣唔係路，信錯專家求錯道；
幾千年前冇股市，咪一樣生活得開心又寫意！

走Q晒，駛唔駛改名？

2008-01-22T17:54:00.000+08:00

傳說人間一樂土，返工唔駛做幾好；
點知個個話唔撈，原來人工唔係高；
加上老細人守舊，下屬返黎咬指頭；
Sell屎叫雞唔在講，請個妖女將佢縛；
寄望老友新環境，返工放工齊盡興；
明月尖東照人影，山寨重現光明頂！

該走一刻我應該走

2008-01-22T16:38:00.000+08:00

難得五哥跟六叔都已先後在此跟大家道別，身為最盡忠職守的七仔又怎會不跟大家交代一下呢。

五哥，唔好意思，你既臨別巨著 -- 展覽大亨 -- 係第一回完結後，第二回竟然爛尾，我想大家都再沒有興趣跟進大當家跟魔女的歸〈七仔才疏學淺，唔識個歸字點寫〉房事吧，要看倒不如回家看看吉澤的演出還更賞心悅目。但是五哥，不要因為新寨事忙而荒廢你一身好文采啊！記著抽時間發揮你的所長，等著看你的大作……還有介紹新的女當家給我們認識唷！

六叔，唔好意思，應承你要離寨的，但日子一再推遲，請你原諒我生性懶散，留戀寨內安穩的日子吧。從今以後，我要不斷進步，不再做七仔，學前輩所講，「我寧願做一日英雄，都唔要一世做七仔！」聽聞你加入了新寨，替新寨找當家…再替當家找新寨…啊！很亂啊！總知要努力啊！不信命，只信雙手去苦拼，等你帶七仔去和你的漂亮女model出海暢遊啊！

好了，今天就談到這裡，無間山寨已變成無間三寨了。

要走的都走了!很好!

2008-01-17T15:26:00.000+08:00

終於要走既都走晒，希望無間山寨既寨友，係新既工作環境，都可以重新振作，重過新生，重新做人，重蹈覆．．．啋！

展覽大亨－－第一章[CEO]

2007-11-22T17:02:00.000+08:00

偌大的會議室內，坐滿了環球國際展覽的要員。在這裡，各司其職，各在其位，每人的位置，都是根據各人在公司裡的地位而劃分，清清楚楚，毫釐不差。

坐在左邊第一位的，是掌管了銷售部超過二十年，帶領著過百人的銷售隊伍，年營業額超過十二億港元，年齡已介六十，凡事愛過問、愛挑剔，育有一對正放洋外國的子女，十多年前與丈夫離異，人稱的獨裁女魔的營業董事孟小橋。

而坐在右邊第一位的，是一向與孟小橋在公事上絕不咬弦，但私底下卻能做到心無介蒂，人稱傻大姊，患有輕度燥狂的未婚中年女士，市場拓展董事蕭金玉。

居中而坐一人，年約四十開外，但仍然一副孩子臉模樣，手托著前額，眉深緊鎖，聽著兩個女人在喧鬧對罵，正是統領著年逾二十億港元營業額的環球國際展覽主席──方正國。

其餘的人分別有脾氣尤如活火山的資訊科技部及設計總監柯一鳴；行徑低調、從不參與發言的市場傳訊部經理郭志仁；能言善辨、自認懷材不遇的項目發展總經理衞國豪；公司傳聲筒、做事馬虎、身裁肥胖的行政部主管汪欣兒與及其餘一眾項目、銷售及市場經理。

雖然會議室內坐了二十多人，但卻只聽見兩把女性爭吵的聲音。

孟小橋瞪著方正國這個主席，道：「我都唔知你呢個主席點做，總之，我地班sales要市場部好好配合。」

蕭金玉一掌擊在會議室的長桌上，叫道：「你咁講算係點？乜野叫好好配合？做乜唔係你配合我，要我配合你？」

孟小橋毫不示弱，道：「咁你係市場拓展部，你唔配合我，我地班sales點做？方生你話我有冇講錯先？」

兩女望著苦惱中的方正國，方正國卻只望著檯面上的文件，輕聲道：「一人少一句先，依家開緊會．．．」

項目發展部總經理衞國豪舉起雙手，伸了一下，站起身來，拋下手中用以紀錄開會議程的小紙張，看看手錶，一臉豪不在乎的道：「唔好意思，方生，我今晚約左個客打邊爐，走先。」只見他頭也不回，逕自走了出去，似乎並不是在徵詢方正國的意見或批准。

方正國望著已經走遠的衞國豪，再望望手錶，道：「原來已經成九點幾，好啦，大家都倦啦，今日到此為止。」

只見孟小橋與蕭金玉彷彿早已冰釋前嫌，一邊走出會議室，一邊道：「喂，亞玉，今晚約左萬隆老李食飯？你去唔去？」

蕭金玉叫道：「緊係去啦，正，今晚又有酒飲！」

望著兩個老牌女魔頭，柯一鳴嘆道：「都唔知呢間係乜野公司？」

郭志仁道：「公司？呢間係公司黎咩？」只見他冷笑而去。

其他人都魚貫離去，就只剩下方正國一人收拾著凌亂的會議室，幹著與職位極不對稱的活兒。

展覽大亨－－預告

2007-11-22T11:43:00.000+08:00

兩個好朋友，如何由籍籍無名的小人物，晉身為展覽業鉅子，為香港締造出二百億元的生產總值？他們又如何演變為商場上誓要置對方於死地的敵人？金錢、名譽、地位、情人、家庭，到底怎樣才能夠觸動人心？一幕幕精彩劇情，將會在這裡長篇連載，足本上演！

密切留意－－展覽大亨！

又係富臨！

2007-09-30T12:53:00.000+08:00

又到中秋月又份外圓，當然係一家人團聚既日子，亦都係荷包大出血既時候，不過要老婆開心，先要佢媽媽開心，冇計啦。

同老婆仔相量左好耐，卒之都係覺得富臨個野海星湯好飲，就決定去呢間！

入到去，七點零鐘，重有好多位下，個陣得我一個，就坐下先啦。點知坐下坐下，四週圍人愈黎愈多，冇幾耐就爆晒棚！我都有少少唔好意思，好似霸住張枱咁，點知有個侍應亞姐，係我身邊週圍咁行，又眼超超咁，重爆左句：「一個人霸住張枱！」

仆你個街，我都知我係霸住張枱，我都唔好意思，但係如果你富臨係咁介意人地霸住張枱，你咪要人地人齊先比枱啦，你唔好比左枱我，你又話我霸住，咁乜野意思先。好勒，呢獲算，就當我唔岩，霸住你張枱。點知，後尾又走條穿黑色西裝既經理埋黎，係咁催我叫送。喂喂，我人未到齊，叫送做乜？係咪坐多陣都唔得？乜野酒家呀呢間！

等左成三十分鐘，我地先到齊，講真我真係有D唔好意思，不過有辦法呀，咁唔遲都遲左，點先？係咪人客遲到，你間酒家就要比面色人睇？叫送仲衰，呢樣又話冇，個樣又話冇，逼人叫餐，我問佢冇你又放張菜牌出黎？佢竟然話：我都叫左你早D叫架啦，依家係乜都冇架啦，叫餐啦，D餐好平之嘛，又平又正，你就咁叫條魚都三舊啦，加埋個翅埋單起碼七舊，依家六舊幾有個餐你食咪算底囉！

你老母你D語氣認真有問題，好似我冇錢食咁，個陣個心實在好慶，不過外母係度，唔方便發作，卒之就叫左呢個一D 都唔抵食既所謂餐。

我發誓，以後誓不再光顧富臨！

Mr Steak 《下》

2007-06-17T22:22:00.000+08:00

話說老婆背後，有些異常騷擾之聲音響起，我望向老婆後方，只見四個惡形惡相、年紀約3x - 4x之婆娘，正揪著牛扒經理質問，我嘗試將這段對話完完本本記錄下來：

牛扒經理：對唔住，幾位小姐（牛扒經理淨係呢句小姐，已經將真正既小姐狠狠地鋤了一下，抵罰），公司規定，我地唔可以咁做架。

婆娘中的婆娘：有乜唔得呀又，我去度度食都得架啦，依家叫你分單，咁都唔得？

牛扒經理：唔係唔得，不過因為今我地係同商場一齊出優惠畀食客，你咁樣分單去攞優惠，我地好難解釋架。

婆娘中的婆娘（唔好意思，呢個稱呼太難打，下次直接打八婆，請見諒）：點解唔得呀？咁你唔畀我地係分開架，四個人，兩個人坐一張檯唔得呀？

牛扒經理：（嘆氣）得．．．你明明係一齊，要分單就緊係唔得啦，咁你既然都講到要分開坐，咁當然係分開單啦。

八婆：咁同我地坐埋一齊有乜分別呀又，你唔畀我地明明分開坐，但係咁岩撞倒，咁就坐埋一齊食，之後分開比錢，咁又得唔得呀！

牛扒經理：（再嘆氣）呢d係公司規定，我明知你地係一齊入黎，咁我好難做架。

八婆：咁啦，我唔令你難做啦，你拎我地杯水去個邊張檯，一陣有野食我地過去食，依家你就當我地咁岩撞倒，坐埋一齊傾計，咁得未呀！

（牛扒經理無奈地將佢地兩杯水搬去隔離枱）

八婆仲繼續同其他婆娘講：嘩，我地每人個餐二百幾銀，叫你分開單都唔得？我平時出入酒店餐廳都係咁架啦，你呢度乜野咁巴閉呀？你估你d優惠真係有寶呀，我係唔抵得佢唔比我分單！

聽到呢度，我輕輕手叫個經理埋離，本來想問佢究竟有乜野優惠，不過諗諗下，問黎都多餘，我不嬲都唔多理佢有冇優惠，結果淨係問佢攞左張意見調查。

無耐，後面幾個八婆經過一輪討論，結果唔知點解冇人激佢，佢都自已激到自己起身走人，一路行仲一路講：依家我冇錢食野呀？我使受你氣？你唔肯分單咪算囉，我去間肯分單既舖頭食！有錢都唔比你賺呀！衰公！

最後，唔知係咪因為畀幾個婆娘影響，覺得食物普通，只好草草了事，結賬離去。

我真係好想知道，佢個晚會唔會激到自己瞓唔著。

Mr. Steak !《上》

2007-06-15T09:55:00.000+08:00

自從老婆搵倒工之後，好耐冇同佢撐檯腳，睇佢做野咁辛苦，就特登請半日假同佢去街街，一齊食下晚飯咁。上次老友介紹新城市七樓，wow，裝修之後，的確係唔同，間間食肆都有番咁上下排場，價錢亦有番咁上下貴，咁緊係啦，d大地產發展商點知會有人依家既人工重少過96年？算啦，講都無謂，食野最實際。

同老婆左行行，右行行，間間佢都想食，間間都話正，我就不停睇住d餐牌，同埋用極速心算，算下個銀包同呢個月既卡數，睇下月尾會唔會all but luck, 係我未計完既時候，老婆就話：「我想食西餐呀！」西餐？冇問題！

我地卒之走左去一間叫Mr. Steak既餐廳。佢門口個餐牌寫住：亞拉斯加長腳蟹！老婆冇睇溏心風暴，唔知長腳蟹既背後，有一段林峯同鍾嘉茵可歌可泣既愛情故事。老婆見我眼定定咁望住隻長腳蟹，講左句：白痴仔！就自己入去搵位坐。唉，老婆，你乜都唔知，我唔怪你。

我地搵左長大沙發坐低，睇落好舒服，點知座落同張檯好似隔條河咁，食野要woo低個身，好彩老婆唔係著低胸裝，否則就春色無邊。女侍應好有禮貌咁拎左幾個餐牌埋黎，睇佢個樣，都可以用索黎形容，條腿有咁長得咁長，趁老婆唔在意，細細聲咁問佢：你著到咁短條裙，想誘惑我呀？只見佢笑左一笑，個口up左句野，但我聽唔清楚係乜野。一心諗住等佢woo低個身放低個餐牌，呢獲就算食幾百銀都低番，點知佢竟然可以企得直直咁due低個餐牌，shit！

出乎意料地快，老婆已經揀選左心頭好，當然就係亞拉斯加長腳蟹啦！而我呢，經過一輪極速心算之後，就叫左一個牛肉鍋飯。

趁d野食未黎，又見四圍環境咁正，就拎部Canon 400D出黎同老婆影番張靚相。點知影左幾張，就發覺鏡頭之後，即係老婆身後，有一d不尋常既異物在燥動，而四周亦被呢d異物所發出既聲浪污染．．．

多了解子女上網模式

2007-06-06T10:25:00.000+08:00

兒子：爸爸，為甚麼你總是整天在我的電腦看色情網站！

專家之言少年沉迷鹹網須及早輔導 (蘋果日報）

2007-06-06T10:21:00.000+08:00

有這麼多社工嗎？

猜迷三《良心題》

2007-06-05T09:05:00.000+08:00

片中一共出現了多少次天安門？

溏心風暴《一》夫妻之道

2007-05-15T23:08:00.000+08:00

大契：（痛心地望著Jackie）Jackie，你老實同我講，你重愛唔愛亞Gil？
Jackie：（點點頭）愛．．．
大契：（痛心地望著Gil）Gil，咁你呢，你重愛唔愛亞Jackie？快D答我！
Gil：（免為其難地點點頭）愛．．．不過．．．
大契：（愕然地）不過？愛咪得o羅，重不過乜野？
Gil：真係要我講？
大契：緊係要講啦，夫妻之道，貴乎坦誠！
（只見Jackie不斷耍手擰頭）
Gil：好啦，媽咪，其實．．．Jackie．．．有臭狐！
大契：（嘆左一口氣）夫妻既野，唔係你忍我，就係我忍你架啦，要忍一世架。
Gil：但係．．．佢仲有口臭．．．
大契：唉，你唔好咁掩尖啦。
Gil：媽呀，佢．．．
大契：又點呀？
Gil：佢早午晚都不停係我身邊放屁呀，真係好難頂架。
大契：（掩住個鼻）Jackie，你係唔係岩岩又．．．（Jackie害羞地點點頭）
Gil：媽，佢最離譜既我都未講．．．
大契：唔係掛，仲有離譜D既野？
Gil：（點點頭）佢．．．
Jackie：（淚如雨下）Gil，我求下你唔好講．．．
Gil：唔得，我唔可以瞞住媽咪，我要同你離婚！
大契：（哭著）咁究竟係乜野事丫？
Gil：（指著Jackie）佢．．．佢．．．
大契：佢乜野呀？你講啦！
Gil：佢企係度小便架！你話點忍！？
大契：（望住Jackie呆住）Jackie．．．你．．．唔係呀話．．．
Jackie：（低頭含羞）其實．．．我原本叫Jacky！
（大契迅即倒地不起）

香港人，輕鬆下啦

2007-05-10T00:58:00.000+08:00

靚女mary同型仔jacky一齊做完運動返屋企，mary二話不說先走左去沖涼。半個鐘後，mary沖完涼，用浴巾遮住身體就斯斯然行出來，jacky見到梗係拿拿聲入去沖番個靚涼啦。

說時遲，那時快，mary聽到有人按門鐘，於是就行去開門睇睇邊個啦。門一開，原來係隔離鄰舍阿強。

阿強見到咁索既mary全身竟然得條浴巾僅僅遮住身體，當堂火都黎埋，就問：「mary，如果你肯除低你身上既浴巾俾左我，我即刻俾兩萬蚊你。」

mary見咁著數，就除左條浴巾，赤條條咁企係阿強面前。阿強眼睛飽吃冰淇淋後，就拎左mary條浴巾，同埋俾左兩萬蚊cash阿mary，跟手就走左啦。

mary拎住兩皮野，一邊開心同諗唔明點解d錢可以咁易搵之際，就聽到沖涼房jacky大聲問：「mary，頭先按門鐘果個係邊個呀？」

mary：「啊，係隔離屋阿強之嘛。」

jacky：「啊，係阿強呀，佢係咪過黎還番兩萬蚊俾我呀？」

Seven Returns

2007-05-10T00:31:00.000+08:00

所謂江山依舊，人事已非。
萬料不到七仔只是閉關七七四十九日，寨內竟面目全非！
走的走，來的來，來的又走，走了又來，唯一不變的，就是七仔對當家的一顆赤子心。
不怕明月照尖東，只想做好呢份工！
七仔以心待之，奈何當家當狗吠。
轉眼間，七仔已螫伏三載，但仍未能取信於當家。
當家啊當家，你可知今天是七仔為當家賣命的第三個年頭啊，難道你還懷疑七仔懷有鬼胎，而遲遲不肯給我通過試用期嗎？

猜謎二《電影題》

2007-05-06T18:21:00.000+08:00

『吹，個波，吹個大個波』呢句對白，係邊套電影入面出現過？

猜謎一《娛樂題》

2007-05-06T18:12:00.000+08:00

（估中冇獎）

曾華倩跑步，猜一男藝人。

求診記《下》

2007-05-06T15:04:00.000+08:00

話說大明星披星載月跑到希爾頓某醫療中心．．．
大明星：「姑娘，我是來求診的。」
只見姑娘笑容可掬，道：「來這裡的，當然是求診，難道另有目的？」
大明星：「姑娘此話不假，綜觀診所之內，年輕男子佔總人數六成，這個數字，又豈是一般診所所比？」
姑娘笑臉如花，道：「未知公子所指原因為何，未知可否不吝賜教？」
大明星：「當然可以，承因這裡一眾姑娘國色天香，傾國傾城，臉如瓜子，身裁出眾，一般凡夫俗子，又豈能扺受如此誘惑？即使無病無痛，亦會借故求診，以求一睹姑娘芳容，一嘗姑娘體香，死也足惜。」
姑娘臉泛紅霞，笑道：「公子言之鑿鑿，未知公子又是否因此才前來求診？」
大明星搖頭道：「姑娘，在下雖然一介草民，但仍知禮、義、廉三字真言，豈會有冒犯之意？」
姑娘疑惑道：「公子，為可少了一言？」
「那一言？」
「就是禮義廉恥的恥啊！」
只見大明星沉默不語，後面卻傳來一人叫道：「仆你個街，不知羞恥，溝女就溝女啦，講咁X耐，後面幾百人病X死左啦！」

救診記《上》

2007-05-02T22:35:00.000+08:00

大明星上星期不慎感染風寒，發著高熱，有燒壞腦腦病死變死蠢之危。唯有冒生命危險，偷偷從太座錢箱之內，盜取三百元以作搵大夫之用。大明星以電話掛號，豈料，一聽之下，大明星發覺事情極不尋常，原因乃接聽電話之姑娘，聲線溫柔，語句關懷，實非一般寬頻推銷之九流電話，令人內心七上八落，連忙換過衣裳，抱病跑到大夫診所，誓要一睹盧山真面目。

近期上影好戲

2007-04-01T21:48:00.000+08:00

仿膳飯莊（下）

2007-03-30T23:08:00.000+08:00

岩岩比人投訴，即刻續返個下集你睇！

上集講到比門口條中女唔覺意咁啤左一眼，好！算數，鬼叫我唔係食幾千蚊碟貴野，你白鴿眼自然有你既道理，我忍你！

果然白鴿即係白鴿，佢俾我地張枱，係全場最差個幾張之一。點差法？我望倒門口D人，門口D人又望倒我，而且個門口我都唔知點解佢叫做門口，都冇門既，D風"Fa Fa"聲咁吹入黎，愈坐愈係唔舒服，卒之忍唔住想調位，仆街！已經全場爆滿！你有冇咁好食？有冇咁好生意呀又！OK，既然咁多捧場客，我又試下你D野好唔好食先。

老婆仔同本menu搏鬥左30分鐘，卒之落order啦，佢決定唔要四人餐，佢細細聲咁話：「你知唔知呀？」
我問佢：「老婆老婆，你唔講我點知呀？」
老婆仔話：「哎，我係想話呀，分開叫仲抵食呀！拿，我叫左個椒鹽炒大蝦啦、花膠湯啦、小籠包啦、帶子啦、菜啦、仲有味呢度最大張介紹既招牌貨－－北京填鴨呀！嘩哈哈！」

話時話，老婆仔的確係識叫送，叫晒自己鍾意食既野。呵呵，我唔係投訴喎，我反而好欣賞，鍾意食就話鍾意食嘛！

好啦！D送黎齊，我地四個一邊食，一邊讚，又一邊彈，椒鹽炒大蝦，入味野味，百幾銀得幾隻，但真係正，不可不吃！花膠湯，一個字，正！小籠包都幾好，水準之作，其他不過不失，但係講到佢既招牌貨北京填鴨～可能我未食過其他地方整既，不能比較。鴨鴨較乾身，食落索索聲，味道呢．．．最好味只係點鴨鴨碟醬，總之就係我唔覺得可以做招牌囉。

朋友話，有如此中女，便有如此北京填鴨！未知此話何解？

Cavatina

2007-03-11T22:59:00.000+08:00

仿膳飯莊（上）

2007-03-09T17:41:00.000+08:00

又係時候同外母聯誼既日子，老婆仔每到呢個日子都會非常興奮，原因一來可以孝順媽媽，二來又係自己最喜愛既活動之一：食！咁岩又有兩百蚊Coupon o係手，老婆仔覺得零捨抵，順理成章，就去左呢間一直諗都未諗過會黎食飯既京粵菜館－仿膳飯莊食飯！

話說我一個去到九龍灣德福商場先，德福我就去過好多次，但一直都未去過二期既五樓同埋六樓。原來五六樓別有洞天，兩層樓分別聚集左唔少既食肆，包括海鮮酒家、越南菜、京菜、西餐、日本菜．．．差不多可以用包羅萬有黎形容。

第一次上六樓，我唔知「訂」搭乎手電梯上，一直上上到六樓，點知六樓唯一既出路竟然係一間機舖。又唔見有電梯可以落番去，無路可逃之下，唯走入機舖，睇下有冇出路。愈行個心就愈驚，點解間機舖咁大？行極都未到另一個出口？會唔會根本無第二個出口？咁D人點落番去？一路行一路胡思亂想，順便又望下D小朋友打機。嘩，依家D小朋友，真係唔好睇小佢，細細個已經婷婷玉立咁坐係個男朋友大脾上面打機，又著住件吊帶小背心，攪到我都有多少心猿意馬，唔覺唔覺咁竟然坐左落呢個臭飛另一邊大脾。我見佢好兇惡咁超住我，但係佢個好可愛既女朋友就笑到格格聲，我立即起身陪罪，拿拿聲就向前繼續走，好彩佢冇追黎，如果唔係我怕我又要大開殺戒，到時佢就真係九條命都唔夠死，嘿！

終於穿左出去間機舖，眼前忽然豁然開朗，四周林立左好多間裝修豪華既食肆，淨係睇見都有D腳軟，心諗呢種食肆收費一定唔少野。我行左一個圈，搵倒我今間食飯既地方－－仿膳飯莊！講真，除左上次去酒店食自助餐，我真係好少去呢種級數既食肆消費，不過應承左老婆仔，冇法啦，硬住頭皮都要去。但係都係小心D好，決定睇睇個menu先！

我走到埋去，門口有個中女，但係都相貌娟好，佢好有禮貌咁問我：「先生，幾多位？」我就同佢講：「唔知有冇menu比我睇睇先？」

佢繼續保持禮貌咁比左本menu我，跟住就理都冇理我，連介紹一句都冇，都唔知佢邊度鄉下。

睇左幾頁，嘩，幾千蚊碟送都有，再睇，好在，有好多七八十蚊碟，再睇睇，wow，四人套餐，合共六百幾，扣番二百蚊coupon，都只係四百幾，都仲食得起。不過為左保險計，我仲問佢：「中女．．．呀唔係，係小姐，呢兩張coupon可唔可以用呀？」

條中女啤左我一啤，就叫我等陣，攞左兩張coupon入去問，問左一陣就出番黎，冇乜表情咁同我講：「用得架！」咦？我好似睇見佢因為我用coupon，似乎唔多高興喎，希望只不過係我既錯覺啦！

柏寧酒店CafeOne自助晚餐（三）結局篇

2007-03-02T23:27:00.000+08:00

當我食完碟意粉，睇住老婆同外母拎住一碟一碟大蝦返黎，嘩，真係隻隻大過手掌，望到我流晒口水。我老婆一路食，一路望住我望住佢，問我：「你望乜？」

我答：「我．．．我想食．．．」

佢笑住咁話：「想食咪自己mock殼o羅．．．呵呵呵．．．」

豈有此理，明知我最憎mock蝦殼，竟然唔施捨一兩隻蝦毛過我食下。

見倒佢咁囂張，條氣真係唔順。哼！出面大把野食，你荒我無野食？

出去打左個白鴿轉，轉眼又攞左成碟肉返黎，又豬又牛又雞又魚，真係大魚大肉。我老婆問我：「老公，點解你硬係攞埋D快餐店都有得既野？食蝦食蟹o麻！」

鬼唔知食蝦食蟹抵D！我都唔知點解我呢種人，硬係鍾意食快餐店野！無計，費事同佢講咁多，填飽個肚先。

食下食下，覺得個肚好似攪下攪下咁，唔係呀話，唔通D野唔乾淨，攪到我肚痛？嘿，我比幾百蚊食你一餐，你竟然食到我肚痛急屎？我實投訴你間酒店。我老婆外母同姨仔，睇住我用大脾挾住挾住咁走左出去，理都冇理我繼續照食。去到門口個counter，睇見個著得幾靚幾青春既女仔，睇黎男廁鎖匙都係佢度，無理由咁失威，比佢知我急屎。唯有挾硬伸直條腰，同佢講：「May I ask...屎坑係邊？」佢笑笑口遞條鎖匙比我，話：「門口轉左，去到最尾轉右，再轉左，上樓睇之後第二度門就係架啦！」

嘩！轉左又轉右又上樓梯，咪屎都標埋出黎？唉，冇計，唯有跑過去。其實都冇個位小姐講得咁複雜，佢話轉左直去咪得囉，大佬人地急緊屎你仲講咁多野，靚女唔係大晒架！

總算有驚無險，返到埋位，剛剛想同個部長投訴一下，點知老婆就問我：「老公，今朝我發覺檯面唔見左個麵包。」

「麵包？係咪個兩片白麵包？」

「係囉！」

「咪我食左o羅，做乜事？」

「冇呀．．．」

「快D講啦！」

「我想同你講，個兩片麵包．．．成個月架啦，今朝我仲諗住掉左佢，不過都好啦，你食左，冇咁浪費。」

今晚阿sir請食飯

2007-02-28T00:10:00.000+08:00

時間：晚上九時
地點：公司
人物：CEO，員工甲、乙

員工甲、乙正在扮勤力，留守在公司工作中。

CEO在CEO房中偷看公司員工的一舉一動，看見員工甲乙正在努力工作，心中不禁暗喜。CEO走出房，向員工甲乙說：「阿邊個同阿邊個，你地既工作態度真係好，如果唔係你地，公司都唔能夠好似而家咁如日方中，公司真係多得你地唔少。好啦，為左獎勵你地，今晚阿SIR請食飯！」話畢便逕自回房，繼續偷看。

員工甲乙聽見CEO一席話，深受感動，並努力扮勤力工作的同時，開始計劃：「我要食好呢餐送！」

不久，CEO著起筆挺西裝，拎起公事包，熄了房燈，再對員工甲乙說：「好喇，我要去梳乎一下，走先，你兩個叫外賣記得開單CLAM錢喎。」員工甲乙聽後互望一下，甲笑說：「哈哈，咁唔叫外賣，出去食都有得CLAM架呵，哈哈...」CEO聽後突然面色一沉，心想：呢兩條友仔，上得床來牽皮X〈編按：唔識打呢個X字〉，諗住俾你地CLAM番廿蚊外賣錢，你兩個竟然食住上...

員工甲知道自己衰多口，便拿拿聲繼續扮其勤力，做其工作。

柏寧酒店CafeOne自助晚餐（二）

2007-02-14T12:13:00.000+08:00

亞水哥並無打擾我地進餐，好識做咁只係傾左兩句就行開做野。跟住，我地四個就輪流出去攞野食。見倒檯面琳瑯滿目既食物，真係食指大動。

之前我都話過自己食自助餐一定係浪費，因為，第一樣吸引我食既，就係抄意大利粉。見倒隔離個細路女用好鄙夷既眼神望住我，我睇住佢老豆行開左，作狀用叉叉佢，佢竟然面無懼色，好似想話：「你敢？你信唔信我喊比你睇？」我亦用面部表情話畀佢知：「死o靚妹，You will pay！」忽然後面有把好沉厚既聲音響起黎：「囡囡，乜野事？」

擰轉面，見倒個神高神大既男人，天寒地冬著住件性感小背心，擺到明係想晒肌肉。我不嬲最尊敬呢一類筋肉人，即時同佢講：「筋生，你囡囡好趣緻呀！」

佢好似運起十成功力咁拍落膊頭，仰天狂嘯，道：「呵呵，冇錯，個個見倒我個女，冇一個會話佢唔可愛，佢人又靚又斯文，似足佢亞媽呀．．哈哈哈．．．」見倒亞筋生講講下笑笑下，忽然收起佢好似老虎狗既笑容，一下子好似蒼老左幾十年，更眼泛淚光。但係佢望住自己囡囡個陣，仍然強行擠出一副笑臉，似乎唔想比囡囡見倒佢咁既神情。睇黎，亞筋生同佢太太既背後，應該有一段刻骨銘心既事情發生過。

我拎住碟意大利粉，巡遊左一個圈，搵極都搵唔倒頭先隔離兩公婆個D龍蝦。咁我就走去問亞水哥，點知水哥話：「你有冇睇錯？呢度冇龍蝦喎？不過呢，大生蝦、生蠔、三文魚刺身、長腳蟹都有！」

明明見倒佢地食龍蝦，冇理由架？轉過頭望返去兩公婆坐既地方，已經執拾整齊，完全唔似有人坐過。唔通．．．我見倒．．．！忽然，有把男人聲係我隔離響起：「老婆，D龍蝦真係好正！」佢老婆答道：「緊係啦，自己叫，要加幾百蚊架！」妖！正屎忽鬼！攪到我以為自己撞鬼！

〔待續〕

柏寧酒店CafeOne自助晚餐（一）

2007-02-13T14:59:00.002+08:00

又係一年一度既大日子－－結婚週年 + 過年。

就算平時點慳點孤寒，到左每年既呢個時間，點都要同老婆有個交代。雖然話同一筆錢，可以有好多種食法，例如高級+好食；高級+唔好食；低級+好食；又低級又唔好食．．．點都好，都可以駛倒相同數目既錢。諗完又諗，點諗都好，緊係老婆既意願係最後既決定啦，一年一次，點都要佢食得招積至得。結果，就同佢去左佢一直有得睇，冇得食既地方－－柏寧酒店CafeOne，食左一餐勁既！

打電話去book位，個位小姐好親切咁同我預留位置，第二日仲會有電話confirm，問我黎唔黎，我同佢講：「你估我有得揀唔黎咩？」

收左工，我第一時間驚死遲到，老早就去到CafeOne。唉，呢種食法，其實我就真係唔係太過欣賞，話就話三個鐘任你食，但係自己又唔食得多，貴野又唔係太鐘意食，食一陣乜都飽啦，唔通呢頭食，個頭all完再食過o羊，總之埋單一定蝕大本。

侍應哥哥好高，冇八呎都有七呎，唔係條圍裙我仲以為佢係NBA D球星。佢好專業咁帶我埋位，我嘗試用假身甩開佢，佢笑笑口望住我，以為我係白痴。佢帶左我埋個窗口位，景觀都唔錯。睇見隔離兩夫婦，每人一碟開邊龍蝦，心諗：「一陣點都要食翻夠本。」

等左冇耐，老婆同妹妹同外母都黎埋，個長人又走埋黎，見佢同我老婆打招呼，我即拎起個藍球，走去佢面前，隔開佢兩個，同佢講：「高佬，呢度咁多老婆你唔聊，係要聊我老婆？信唔信我入你樽丫拿？」

我老婆即刻襟住我：「hey!你咪咁啦！呢個咪我成日同你提起既同事亞水哥o羅！高你又唔夠人高，仲話入人樽！」哦，原來佢就係周不時關照我老婆有工開既水哥。

我唯有面懵懵咁：「啊，水哥，你好你好。平時真係多得你關照內人。」我仲走埋去想同佢握手添。

點知水哥好專業咁輕輕按住我：「你地係客人嘛。請坐，我幫你地倒幾杯水先。」

[待續]

與CEO對話

2007-02-02T09:39:00.000+08:00

CEO：小桂子，你入黎我房，我有野同你講！
小桂子：哦。
（小桂子懷住不安既心情入到CEO房）
小桂子（顫聲）：C...CEO，你搵我唔知有乜野事呢？
CEO（一副淡淡定，冇錢剩格局）：冇，想同你傾下計。
小桂子（如獲大赦）：哦，咁都冇咁驚，我小桂子最鍾意同CEO你D種成功人士傾計，哈哈哈！
CEO（眉頭輕微跳動）：係呢，做乜咁遲先返呀？
小桂子（眉飛色舞）：哦，冇呀，同出面班同事一齊去食飯，跟住就去入票o羅。
CEO：但係你知唔你遲到呢？
小桂子（仲笑笑口）：我知，不過我第一個月出糧，係緊張D，CEO你咁好人，我知你唔會怪我。
CEO（點點頭）：唔，咁又係。不過．．．
小桂子：不過乜野？
CEO：不過，呢次可能亦係你最後一次出糧。
小桂子（開始有D慌）：下？點．．．點解既？
CEO：我發覺，你做野好唔專心。
小桂子：係．．．係．．．我會改架。CEO你咁好人，你比次機會我啦！
CEO（又點點頭）：重有．．．你做既野，質素唔達標。
小桂子：下？出面亞五哥話唔標唔緊要架，佢話全公司都冇人做野達標架，佢又話CEO你好好人，一定會比機會我學好架。二姊都話叫我放心係度做架。
CEO：我知道，後黎亞五仲話，通常二姊叫放心既，最後都炒左，你唔記咩？
小桂子：又好似係喎．．．
CEO：（再次點頭）：其實，最重要既係．．．你呃我！
小桂子：我．．．呃你？CEO，我冇呀，你咁好人，我點會呃你？
CEO（眉頭輕微一皺）：你重話你唔係呃我？
小桂子：我．．．我點呃你呀？
CEO：我依家要炒你，你重開口埋口咁話我好人，你仲唔係呃緊我？
小桂子（好委屈）：咁．．．咁你係好人o麻．．．
CEO（開始光火）：你重講？個個都話我好人，你知唔知我好辛苦？你究竟有冇諗過我想唔想做好人？其實我好想做衰人，你知唔知？
小桂子：哦，其實．．．CEO你咁好人，一定可以做到你想做既野。
CEO：唉，冇野啦，你走啦！
小桂子（仲好忠心咁）：CEO，咁你第時重會唔會請番我架？
CEO（出奇）：我點解重要請番你？我最憎既其實就係你呢種咁善良既人。
小桂子：其實，我都唔係你諗得咁善良．．．
CEO：點解？
小桂子：我的確有呃你，不過唔係話你好人係呃你，而係．．．
CEO：係乜？快D講．．．
小桂子（含羞答答）：而係．．．小人尚未淨身．．．！
（CEO立即CALL實蕉將小桂子連人帶馬甩出街外）

漏油事件

2007-01-25T12:28:00.000+08:00

世上有一種魚，服食後能令你屎忽漏油，還不特止，隨後還會有人高調召開記招，為此魚解說，鬼佬說已在食物標籤上清楚列明產地來源與此魚種類，但他們沒有收到出產此魚當地資料顯示，會有屎忽漏油事件，你說此魚神奇不神奇？

論成敗

2007-01-23T10:44:00.000+08:00

身邊成功的大不乏人，有親戚朋友，有自己的朋友，有朋友的朋友，每個人的背後，都有一個建立成功的故事。每次跟朋友聚面吹水，不期然都會提到以上種種。到底，你曾否界定過，自己是屬於成功的一份子？抑或是失敗的一群？當你跟朋友討論著誰如何成功的同時，會否都有二帥兄的想法：「點解？點解唔係我？」

如果要講成敗，我們是否首先要界定，是那一個時空的成敗？才是最終的成敗？曾看一本回憶錄，那是一個加拿大的企業家的自傳，上面寫到：「我的一生，經歷過無數成敗，發過達，破過產，現在，我手持十二間公司，有八間經營穩定，四間仍然在掙扎中。雖然規模沒有Sony般大，但若然稍一不慎，都足夠令我血本無歸。所以，我不能回答你我是成功抑或是失敗，最低限度，在我有生之年，我不能回答你。」這是否一個啟發人心的答案？人的一生，是一條曲線，高低起伏必然有之，蟄伏十年，亦能一飛沖天；家財萬貫，亦能傾家蕩產。所以，你要尋找那一點作為討論你的成敗得失呢？都端看你個人意願。

現今我最喜愛的明星，只有周星馳。並非因為他現在身家雄厚，是一個成功人士，所以特別欣賞。答案很簡單，只因為他揣摩角式實在手法獨特，與別不同，他的幽默感實實在在能引起小弟的共鳴。有時我會想，如果能跟他演一場對手戲，會是多過引的一件樂事。你看他現在是否很成功？不過，我想信他當年主持430穿梭機，戲弄小朋友的同時，不會想過自己能有今時今日的地位。你說他努力也好，運氣也好，要解讀一個人如何成功，相信沒有既定答案。

沒有今天的失敗，就沒有明天的成功；沒有昨天的成功，亦不會有今天的失敗。來吧，我們姑且一起擁抱這對雙生兒，在生命中尋找成功與失敗所帶來的樂趣。

二師兄金句

2007-01-23T10:35:00.000+08:00

點解？點解係你地講既咩？點解我老豆唔係李嘉誠？點解我咁靚仔，但係甩頭鬚，你地咁肉酸，但係冇甩頭鬚．．．

里安導演金句

2007-01-23T10:33:00.000+08:00

每個人心中，都有一個小宇宙！

無間精神

2007-01-12T01:13:00.000+08:00

It's better to fail aiming high than to succeed aiming low. And we have set our sights very high, so high in fact that even failure will have in it an echo of glory.

學神

2007-01-03T19:37:00.000+08:00

一位剛剛升任的神父，慈愛地向小明問道：「小朋友，你知道誰是耶穌嗎？」

小明搔著頭，望著神父，道：「你連誰是耶穌都不知道？為甚麼會升你做神父的？」

神父：「．．．．．．」

好心

2006-12-05T22:30:00.000+08:00

地獄使者：「點解你會落左黎？」
死者：「其實係咁既．．．

話說我同另一個我好唔鍾意既人一齊比土人捉左，土人佢地有個習俗，叫我地每人執一種生果返黎，要十件，話如果可以唔出聲咁完成佢地叫我地做既野，就可以放我地走。

咁我同條仆街分開去執生果，我鍾意食士多啤梨，所以咪執左十粒士多啤梨囉。點知，個土人叫我將士多啤朵塞入屎眼，我心諗，唉，好彩士多啤梨軟軟地，應該塞得晒，所以我咪滿懷信心咁塞囉。」

地獄使者就話：「係啦，咁你點解會死？」

死者：「唉，後尾我見倒我個死對頭執左十個榴槤返黎，我忍唔住笑左出黎，佢地咪殺左我囉。」

地獄使者：「．．．」

食神簡報

2006-11-25T01:32:00.000+08:00

食神食遍中外，以下是最新《食神簡報》：
果日去朋友既婚宴，見到餐牌有一味叫發財?家寶既菜，究景係咩呢？
開估，就係呢味發菜海心搖柱蚊冬姑，至於點解叫發財?家寶，就不得而知了。

四送一湯，係咪好想食呢？唔好意思，有錢都食唔到，住家菜是也！

呢兩味係炮台山蕃薯苗小館名菜：蒜茸蕃薯苗，宮寶蝦仁，一個字形容：好味！

呢間係譽滿香江，位於尖東既鹿鳴春京菜，好多外國人都鍾意係呢度食京菜，味道同價錢成正比例。

食在深水步

2006-10-31T16:30:00.000+08:00

星期六中午，同阿女落區體察民情，去左深水步呢個舊區，睇下呢個兒時常到既地方家下變成點樣。

一落到去，見餓餓地，就去左高登隔離果條街到搵野食。果條街有好多食肆，中西日泰，粥粉麵飯樣樣齊。最後我地揀左一間名叫炳記牛牛<福榮街108號地下> 既餐廳食lunch。呢間野同普通茶餐廳分別不大，舖仔細細，但set左好多位，搞到環境都好擠迫下，果日食lunch又要同人搭?之餘，後面既食客仲幾乎撞到我咁濟，不過就尚算乾淨。舒適度2粒星。

坐低左睇睇個餐牌，嘩！都好多款式喎。除左茶餐廳必備既常餐特餐快餐之外，仲有焗飯意粉小食pizza等等，飲品方面除左咖啡奶茶之外，仲有白衣仙子綠野仙?紫色乳牛等等，款式算係幾多。款式度4粒星。

最後我地叫左一個海鮮焗飯同pizza，仲有杯咸柑桔。冇耐果焗飯就出晒煙咁黎喇，食落味落都ok既，個汁都幾濃，海鮮都係一般既魷魚青口蝦等等，唔算好好食，但都可以接受。至於個pizza都只係不過不失，總括黎講，食物質素係普通過普通，平凡過平凡，3粒星。

食飽埋單計數，一個焗飯一個pizza，一杯咸柑桔一杯凍OT，埋單都係五十五蚊，其實算係十分抵。d焗飯都係幾蚊，個pizza只係18蚊，抵食度有4粒星，唯一奇怪係呢間茶餐廳竟然有加一服務費，比較令人費解。

計晒咁多樣，其實呢間炳記牛牛絕對食得過既，大家落開深水步，不妨到此一試。

食完lunch，巡視完社區之後，就去左糕品界既名牌 -- 坤記糕品專家 -- 買左幾件紅豆糕、芝麻糕同白糖糕返屋企做甜品。呢間坤記聽講出名貴、出名好食同出名個老板娘串。一試之後，原來全部都真既！6蚊一件紅豆糕/芝麻糕，比起其他舖頭果d十蚊三件，呢度真係幾貴，不過用料卻十分充足，紅豆/芝麻味濃烈，件糕都幾重手，比起其他店舖確係勝一籌，至於件白糖糕則有少少過甜。至於果老皮娘，成日黑口黑面，一d笑容都冇，木口木面，的確有一種「唔like咪唔好幫襯囉，我大把生意唔憂做！」既感覺。

計晒咁多樣，其實呢間坤記糕品專家絕對食得過既，大家落開深水步，不妨到此一試。

富豪茶餐

2006-10-26T15:57:00.000+08:00

星期六個日，同阿女去左銅鑼灣富豪酒店coffee shop食左個tea buffet，係講好唔好食之前講下個環境先。間酒店係銅鑼灣鬧市，sogo附近，都幾就腳，一入到酒店上條樓梯就見到間coffee shop，個waiter問完幾位就帶我地入去坐低，周圍環境都幾舒適，仲有電視直播有線足球台，不過冇較聲，唔駛驚會嘈到傾唔到計。

三點半一到，阿女就先出去拎野食，無幾耐阿女就拎住d炸物同一件cake返黎，跟手仲話選擇唔多。我作為食神之子，當然要出去打個轉親身驗證一下。基本上個buffet既選擇同一般buffet差唔多，都係冷熱盤生果蛋糕之類，講真冇咩創意，較特別只係有車仔麵即叫即整。選擇唔多但味道呢？熱盤全部都係炸物咁濟，炸魚蛋、餃子、春卷等，雖然炸得唔錯，但樣樣都炸就太單調喇，唔怪之得阿女剛才拎晒d炸物返黎。

講完炸盤，冷盤更加不值一提，普通沙律，普通味道，不食也罷。而係酒店食車仔麵雖然叫做幾得意，但同出面專做車仔麵既舖頭分別不大，未能做到令人食完想再食。一向為tea buffet主打既蛋糕系列就更加令人失望，款式都有五六款，但只係好普通既cream cake，見到都唔係好想食，唯一有個cheese cake同朱古力cake比較出色，cheese既質感同朱古力味既濃烈都keep到係個cake到，叫做比較好既甜品。至於生果方面，因為有本人最喜愛既菠蘿係度，先為生果系挽回不少分數，其餘既都係西木密瓜，無咩特別。好喇，去到雪糕系，以為酒店雪糕會做得唔差，所以拎出一大杯返黎試下，嘩！無論紅豆雲呢拿定係士多啤利味，食落都只係得奶味，其他味全部俾奶味遮住，失敗！

呢個tea buffet要成128一位，呢個價食咁既野，真係物非所值，好彩阿女有張coupon頂住，先至無咁傷。呢餐tea buffet，真係點埋頭抽都救唔番。

向天后出發

2006-10-21T01:41:00.000+08:00

今晚約左中學同學及大學同學去銅鑼灣食飯飲野，七點半鐘係sogo四樓nike counter等，寒暄一番後，佢就帶左我去利園附近一間吧度飲野。果間吧有兩間室內舖頭，而中間係露天既。我地係室內搵位坐低，叫左支啤酒飲就一路吹水剝花生。呢間吧既精炒之處係花生殼可以通地掉，唔係我地冇公德心呀，d侍應都係咁做，係呢道既特色，所以地上通地都係花生，行起路上黎咯咯聲。係我同朋友既言談間，講起無間Jack係無間食府繪影繪聲咁介紹過既泥鰍粥，大家諗起都想試下，所以飲完野後我地就出發去清風街，尋找隱世仔仔小廚。

一去到青風街，好容易就搵到傳說中既仔仔小廚，我地二話不說推門而入，果真如無間Jack所言，舖仔細細卻佈滿了人，我地好容易就搵到張長?坐低。正當準備點野食既時候，見到有三個人想光顧又冇位坐，我地本著我為人人，人人為我既心，決定成人之美，調去近廚房既雙人坐位，再行點菜。我地兩條麻甩仔，點左三味菜，分別係XO醬炒鮑片時蔬，三杯雞煲，同埋無間Jack搞得好開心既泥鰍粥。點好菜我地就做好晒好味既心理準備，預備品嚐一頓豐富既晚餐...

秒針隨時間過去不斷擺動，不一會三味菜分別送到我們的飯桌上。先上既係三杯雞煲，個煲熱辣辣，d雞慶合合，配菜多羅羅〈但係唔知係咩配菜〉，真係唔駛點頭抽都覺得好好味。之後XO醬炒鮑片時蔬又送到，XO醬既辛辣配合鮑片既趙口，加上時蔬既清淡，三種材料配合得宜，可謂味覺三重享受，真係唔駛點頭抽都覺得好好味。最後送上既係泥鰍粥，鍋粥齋睇個桶都值回票價，粥底綿有泥鰍味，我當然唔執輸起勢係咁搞呀搞，呢一刻終於明白無間Jack當日既感受，可以話係感同身受，定係身同感受？搞完鍋粥後，當然要慢慢品嚐喇，嘩！唔食由至可，一食真係不得了！粥底綿唔再講，而且泥鰍落足，絕無欺場，加埋蔥花作調味，真係要講句：「女阿女，真係唔駛點頭抽都覺得好好味。」

飽餐一頓後，一人八十蚊落樓，話貴唔貴，話平唔平咁啦。一出到門口，發現糖水舖就係對面，我地食到咁飽，冇理由食埋糖水先走，係咪？

係度多謝無間Jack介紹，等我發現到天后原來都有好野食呀！

《富臨鮑魚》大結局！

2006-10-15T14:59:00.000+08:00

奸仔侍應將D送一碟一碟咁送去隔離檯，又燒餓又帶子咁，睇到口水都流晒，偏偏就係未見倒我地叫個兩隻鮑魚。我望住肥婆，肥婆好醒目咁即刻話：「咪咁心急啦，話明係新鮮整，緊係唔會咁快有得畀你食啦，四眼哥！」

死肥婆，你好野！我等！

又等左十五分鐘，檯面上D送都差不多食晒，正準備開口同肥婆展開一場惡鬥，點不知，個奸仔侍應唔知做乜，靜雞雞咁推住架車埋我地張檯前面，又石油氣爐又瓦煲咁，我就問佢：「喂，你想一獲熟呀！？」

奸仔侍應竟然唔理我，繼續做佢自己既野，將個瓦煲放上石油氣爐上邊，口入面唸唸有詞，都唔知係咪咒緊我。不過我都唔理得咁多，你煮你都死開D煮啦，我地又冇叫煲仔飯。

岩岩想開口，老婆即刻襟住我，指下隔離張檯，見倒有個正常D既侍應，係隔離檯打開左個同我地前面一模一樣既瓦煲，原來呢煲野唔係煲仔飯，入面竟然係兩隻肥大肉厚既鮑魚。見倒隔離檯拎住刀叉，慢慢咁將隻鮑魚切開，放入個口度，D汁整到一口都係。

我即刻望住前面煮緊既奸仔侍應，開佢：「喂！得未架？」

佢笑得好奸咁話：「得既你都冇份食啦！」

我叫道：「你點知呀？」

佢指下我老婆同外母，見佢地一人拎住一份刀叉，四隻眼望住個爐。

竟然畀佢睇穿，我就話：「你睇住黎煮呀！煮得唔好食我實投訴你！」

佢笑得仲奸個頭先，話：「我只係兼職黎，嘿嘿！」

呢舖我當黑啦，早知唔好得罪佢啦，依家九十幾雞野係佢手上，兩隻可憐既鮑魚實凍過水，老婆實怪我啦。

過左冇耐，見倒個奸仔侍應打開個蓋，將兩隻鮑魚放上外母同老婆前面，笑笑口咁走開，臨走都啤左我一眼。

老婆同外母輕輕咁將隻鮑魚切開，細細舊咁放入個口到，之後，兩個?面露笑容，用個身擋住隻鮑魚，將檯面碟食剩既苦瓜推向我，問佢好唔好食，竟然一句都唔應我。

~~完~~

見工《四》結局篇

2006-10-05T09:40:00.000+08:00

(兩人坐著，互相看著對方，似乎要從對方的眼神，找到破綻）
老闆（終於都沉唔住氣）：究竟有，定係冇？
同事甲（不加思索）：有定啦！我寫包單，一定有！
老闆（似乎被同事甲回答的速度嚇倒）：你．．．你又知我問乜？
同事甲（悄悄地）：你係想問同事乙有冇去見工，係咪？
老闆（好欣賞同事甲對自己的忠誠）：冇錯！好！你果然對我忠心！連兄弟都出賣！
同事甲（變本加厲）：點止呀！我仲知道，有人靜雞雞同亞周仔聯絡！
老闆（大驚失色）：?．．．同亞周仔聯絡？邊個？究竟係邊個？
同事甲：不過，我講出黎你一定唔信！所以我都唔想講，我唔想你以為我鍾意講是非。
老闆：你講啦！我一定信．．．咪住！你唔係又．．．
同事甲：冇錯，老闆，公司有間諜！
老闆：上次畀你攪到我差D以為你係間諜，你仲黎？
同事甲：老闆，做乜我連兄弟都出賣你又信，我話公司有間諜你又唔信？
老闆：咁．．．
同事甲：老闆，我對你既忠心，可昭日月，你今次一定要信我呀！
老闆：咁．．．究竟係邊個丫？
同事甲（又再次轉彎抹角）：咪係成日表面忠心到死o個個囉！
老闆：你想講既係．．．
同事甲：冇錯，就係佢！
老闆（氣憤難平）：豈有此理！
同事甲：老闆，你點都要做D野，先至可以平息呢次既風波！
老闆：好！既然你咁講，咁你諗住點？
同事甲：叫佢引疚辭職！
老闆：咁．．．係咪即係唔使賠畀佢呀？
同事甲：當然啦，間諜都有錢賠？天方夜譚咩？
老闆：咁．．．你諗住做埋幾時丫？
同事甲：老闆．．．你．．．你講乜野？
老闆：你就係間諜，我冇怨枉你啦，你自己講既！
同事甲：．．．不如我地傾返同事乙既事啦，老闆！

當機

2006-10-04T13:02:00.000+08:00

近日發現部腦經常無綠無故不動聲色係你毫無防備之下突然自動熄機，係百思不得其解之下，唯有用盡方法去找出當機之原因。

1. 中virus
網上世界千奇百怪，中病毒絕對唔出奇，但經過精密既anti-virus software scan過，都發現唔到有中病毒既跡象，好，next！

2. 電腦過熱
一直以黎，部腦發出既聲浪已經超出環保署既標準，好可能係風扇既問題引致電腦過熱，就呢個問題已經訪問過IT部主管，佢認為絕對不能排除呢個可能性，更宣佈擇日作出地毯式詳細電腦檢查，檢查報告將於不日公布。

3. 鬼怪作祟
靈怪既事物，我們所知不多，雖然電腦係科技發展既產品，但靈體入侵電腦既新聞亦時有所聞。好似係1867年美國猶他州一個叫Moab既小鎮就發生過邪靈入侵全鎮電腦既事件，而整件事最可怕之處係1867年尚未發明電腦……

今日，部腦再一次無綠無故不動聲色係你毫無防備之下突然自動熄機，經過IT部主管粗中帶幼、膽大心細既檢查、分析，終於發現問題之根源：我踢鬆左個電制！

一切謎題，終於迎刃而解。

《富臨鮑魚》下集！

2006-09-30T23:16:00.000+08:00

叫左煲海星湯，死肥婆仲唔走開，係度教壞我老婆，又呢樣，又果樣，我於是就問佢：「你地今日有冇D又平又靚架？乜唔係翅就係星班？」

肥婆重未斷氣，竟然話：「又平又靚？緊有啦！好彩你問咋，至怕你唔問！」

我老婆一聽倒話又平又靚，即刻忍唔住就問：「究竟係乜野？」

肥婆拎起個一睇就知唔係超值推介既餐牌，大大聲聲咁話：「就係我地富臨招牌揀手精選完隻新鮮靚鮑魚?！」

我當堂聽到耳都側埋：「乜個名咁長？你可唔可以重覆一次？」

我老婆竟然一字不漏咁話：「係富臨招牌揀手精選完隻新鮮靚鮑魚?！」連個?字都重覆講埋出黎，睇見佢望住肥婆手上面隻紙牌鮑魚，好似想用筷子挾出黎咁，睇黎，呢舖都幾難走得甩。

於是我就問下肥婆：「咁點計呀？」

肥婆就話：「噓，話明係又平又靚既招牌揀手精選，當然係又平又靚．．．」

「咁即係幾錢呀！」

「$48蚊一隻，係正你面前煮，童叟無欺！」

$48蚊？睇黎又唔係貴喎，見倒咁可愛既老婆食指大動，於是就叫左兩隻，一隻老婆，一隻外母，自己呢？唉，算把啦，山珍海味我由細食到大，奇珍異獸屋企一籮籮，甚至乎張床都生滿野生靈芝（不過我大佬話係青苔），係呢D咁地靈人傑既地方住，我係唔會對呢D食物心動既。於是只好將一舊一舊苦瓜塞入個口．．．

叫左幾味送，老婆同外母一邊講鞋講袋，我就一邊用心算算下幾錢埋單。忽然，有條友仔拎住個頭都裝得落既有蓋大湯碗埋黎：「各位，海星湯！請慢用。」

嘩，睇黎肥婆真係冇講大話，可以一人飲三碗。見倒個侍應一邊幫我地筆湯，一邊笑，我就問佢：「大佬，你笑乜呀？」只見佢將D湯渣筆左上碟，掩住個咀就走開左，正怪人。

外母同老婆指住碟湯渣，叫道：「海星呀！」我睇住碟野，橫睇掂睇，點睇都係似牛柏葉。

老婆問我：「食唔食得架？」

我就話：「逢親背脊向天既都食得架啦，海星嘛．．．都算係背脊向天，食得既。」

於是，老婆同外母都挾左一舊黎食，放入口度，嘩，即刻吐返出黎，我見倒頭先幫我地筆湯個奸仔侍應，望住我地係咁笑。

老婆話：「嘩．．．好多沙喎．．．」好在我不嬲都唔鍾意食牛柏葉。

不過，佢D湯真係幾得，夠鮮味，夠份量，海星夠卓頭，算中上之選。

待續．．．

《富臨鮑魚》上集！

2006-09-30T01:17:00.000+08:00

尋日，比老婆知道左公司隔離有出口貨版買，呢個可能係我近日最大既失誤，佢竟然仲帶埋亞媽出黎買．．．，都仲不特止，仲幫朋友買埋。我發誓，下世投胎，一定要學整鞋！

同佢兩個經過一輪混戰，打完獵，當然肚餓啦。行多兩行，老婆隻腳又跛下跛下，同外母又好少聯誼，唯有搵間近近地既酒樓，係咁意食餐飯啦。

好啦！坐底，班侍應?住D餐牌不停咁輪我地，不過都幾有禮貌，但係點都攪到我老婆周身唔聚材，我唯有開口：「唔該，畀D時間我地！一定有一個令你滿意既答覆，好嘛？」

老婆睇左個餐牌好耐，猛咁話D野貴，想幫我慳住個荷包，我心諗，佢真係一個賢妻。過左一陣，我見佢仲未叫野，就望下佢隻眼，點知，見佢望住個特色餐牌入面粒海星，個肥婆侍應醒目，即刻話：「噓，呢煲海星湯真底飲架，鮮味不特止，仲好補架．．．」

我老婆話：「我整親隻腳，唔補得架．．．」

個死肥婆即刻轉口話：「唔補，呢煲湯一D都唔補．．．」

我拿拿聲話：「喂，你頭先話．．．」

頂！畀佢入晒位：「我頭先話呢煲湯滋陰潤肺．．．」

老婆兩眼發亮：「潤肺？咁岩我有幾聲咳．．．」

肥婆即刻食住上：「咪就係咳就岩晒囉！八十八蚊！三個人飲，一人起碼飲三碗，又止埋咳，去邊度搵呀？」

老婆用好可憐既眼神咁望住我，唉，算啦，八十八蚊一煲湯，感覺上都比上一劑三十蚊杯咖啡抵飲D，由得佢叫啦，又唔係成日出黎食飯，點不知．．．

外賣（四）

2006-09-11T16:10:00.000+08:00

客人：阿姐，唔該一黑椒雞扒意。
阿姐〈一邊落單〉：黑椒雞扒意，好，等一陣。
十五分鐘過後......
客人：阿姐，個黑椒雞扒意好耐喇喎。
阿姐：啊，好快好快，等一陣。
三十分鐘過後......
客人：阿姐，個黑椒雞扒意真係好耐喇喎。
阿姐：啊，好快好快，等多陣。
一日後......
客人：阿姐，個黑椒雞扒意會唔會真係耐左少少呢？
阿姐：啊，好快好快，等左成日，唔爭在等多陣，好快有。
光陰似箭，日月如梭.....
仔仔：baba，等左好耐喇，行得未呀？
baba／客人：阿姐，個黑椒雞扒意算把啦，等到仔都生埋都未有，唔要啦。
阿姐：有喇，你睇下，剛剛整好，兩仔爺一齊食，一樂也。
仔仔／baba：......哇wow..........

食壽司！

2006-09-07T22:50:00.000+08:00

老公（望住眼前既回轉壽司，流晒口水）：老婆老婆，我想食呢碟呀！
老婆：唔好，呢碟唔新鮮，等多一陣。
（等左一陣）
老公：老婆老婆，呢碟啦，呢碟新鮮呀！
老婆（耍手擰頭）：唔好唔好，呢碟唔抵架，等多陣啦，你好肚餓呀？
（又等左一陣）
老公：老婆老婆．．．（都未講完）
老婆：唔好唔好．．．咦！你想講乜呀？
老公：我想話呢個月出糧出多左，想畀多兩千蚊你，不過你話唔好，咁就算啦！
老婆：．．．．

見工《三》

2006-09-07T22:36:00.000+08:00

老闆（一臉關心）：聽同事講，你去見工，係唔係？
同事乙（手騰腳震）：?？邊個同事講？
老闆（厚道地）：哦，其實並唔係話邊個同事講既．．．咁．．．有冇D咁既事先？
同事乙（死唔認）：其實並唔係話有冇D咁既事．．．即係咁講，如果我話我有去見工，你都唔會信啦，老闆，係咪？
老闆：咁即係有定係冇？
同事乙：老闆英明，一定唔會立亂相信D鍾意講是非既同事所講咁黎屈我既。
老闆（冒汗，保持鎮定）：當．．．當然啦，既然係無D咁既事，咁你返出去做野啦。
（同事乙抹一額汗走番出去，老闆即刻打畀同事甲）
老闆：你入一入黎。

欲知後事如何，下回自有分解．．．

怒斬三子

2006-08-29T12:02:00.000+08:00

想當年，五哥、六叔、七仔，合稱無間三賤男，於寨中分佔一席位，對外對內，無一不曉，可惜大當家心胸窄、器量少，容不下無間三子，遂狠下心腸，大刀一揮，先取六叔首級，再削五哥軍權，後加七仔罪名，將三子一干人等勢力徹底瓦解。

時至今日，五哥淪為棄卒，六叔漂泊流離，七仔慘成奴隸，三子風光已不復再，可悲矣。但三子浩氣長存，定必另起爐灶，再戰江湖，誓要叱吒風雲，將當日屈辱原銀奉還！

等著瞧吧！

見工《二》

2006-08-24T10:15:00.000+08:00

（看見其他同事及同事丙對同事乙眼望望）
同事甲（大聲地）：咦？乜著得咁靚呀？去見工呀！
（其他同事及同事丙以奇異的目光投向同事乙）
同事乙（若無其事）：緊係啦，唔係見工，做乜著咁靚呀！
（其他同事轉過頭去，如常工作，同事丙很也快便消失於人群之中）
同事乙（悄悄地問同事甲）：佢地好似唔信喎．．．
同事甲：唔信咪即係成功左囉！佢地一定係以為你講笑！
（只見剛才的同事丙從老闆房裡悄悄地走出來，同事乙的電話便響了起來）
同事乙（放下電話）：老闆叫我入房喎．．．
（同事甲轉身如常工作）
同事乙：．．．

（待續．．．）

見工《一》

2006-08-23T09:08:00.000+08:00

同事甲：點解今日著咁靚仔？
同事乙：今日要去見工囉！
同事甲（感嘆）：見工？你就好啦！
同事乙：有乜咁好，又唔係請左我。
同事甲：咦？不過你著到咁，怕唔怕其他同事或者老闆諗你去見工呀？
同事乙：都驚架，你有冇橋？
同事甲：緊有啦，拿，一陣同你做場戲，我會大大聲聲當眾話『乜你著咁靚呀，去見工呀？』
同事乙（帶點驚慌）：下．．．咁咪穿晒煲？
同事甲：唔會既，你重要答我話『係呀，一睇就知係見工啦！』咁。
同事乙（懷疑）：得唔得架？
同事甲：呢D叫做人性心理學，虛則實之，實則虛之，你唔識咁多架啦，總之一陣照做得架啦！
同事乙：哦．．．

外賣 (三)

2006-08-22T11:11:00.000+08:00

客人：阿姐，唔該一個黑椒雞扒意。
阿姐〈一邊落單〉：黑椒雞扒意，好，等一陣。
五分鐘過後......
阿姐：先生，你係咪叫左茄汁豬扒飯？
客人〈好聲好氣的〉：唔係，應該係黑椒雞扒意。
阿姐：啊...咁等一陣，好快。
五分鐘過後......
阿姐：先生，你係咪叫左咖哩牛扒湯米粉？
客人〈不耐煩地〉：阿姐，我唔係要咖哩牛扒湯米粉，係黑椒雞扒意先o岩呀！
阿姐：啊...咁等一陣，好快。
五分鐘過後......
阿姐：先生，你叫既白汁海鮮焗飯，多謝三十蚊。
客人：................哇wow...............

再平D

2006-08-15T00:05:00.000+08:00

伙記：老闆，呢間係我睇過最平既一間。
老闆（睇黎睇去，左度右度）：呢間買魚蛋平D，個間買牛丸平D，而呢間買豬肉丸仲平，不過，平均計都係魚蛋明個間最平．．．
伙記：係啦，咁就幫趁魚蛋明啦。
老闆：咁啦，你問下魚蛋明，問佢D牛丸可唔可以畀牛丸強個價我地，再問下佢豬肉丸可唔可以畀豬肉榮個價我地。
伙記：老闆．．．你係得既！我真係服能左你！

外賣（二）

2006-08-10T14:11:00.000+08:00

客人：唔該，一個茄汁雞扒飯，要蒜蓉汁，外賣！
侍應（一邊寫）：茄汁雞扒飯，要蒜蓉汁．．．ok，等陣啦！
客人：．．．．．．

外賣（一）

2006-08-10T14:08:00.000+08:00

客人：唔該，一個茄汁雞扒飯外賣。
侍應（一邊寫單）：茄汁雞扒飯外賣．．．（好勞氣地）要乜野汁呀？講埋啦！
客人：．．．要茄汁．．．（Fuck！）

終於換底

2006-08-10T10:02:00.000+08:00

昨晚，其中一名賤男成功將本站底碼更換，雖然用Firefox睇無甚變化，但總覺得整個「扑」煥然一新，而面對微軟這種富可敵國的公司的產品，竟然在這簡單的關鍵上不能人道，本人深表遺憾。

從呢件事上面，可以睇倒，一D潛藏既傷患，往往令事情事半功半。可能就係呢種原因，導致好多能夠發光發熱既好概念，到最後都無疾而終。如果能夠將傷患根治，我相信，問題將會迎刃而解，事情亦會露出署光，由負面走向正面，正面的循環會慢慢引領我們走向成功，逃離谷底。

世事禍福難料，期望賤男能夠轉危為機，別劃地自限，重新振作，一洗以往頹氣，展翔高飛。

引用廣告歌曲：I believe I can fly, I believe I will die without doubt........珍重！

戰死寨中

2006-08-08T12:39:00.000+08:00

I have a pen, the pen is blue
I have a friend, the friend is you.

洗潔精、萬潔靈
沙粉難洗友誼情

One Day Uncle Six, Forever Uncle Six

2006-08-01T01:05:00.000+08:00

Now that we shall be apart
You are always in our heart

去吧! 無間兵團

2006-07-21T12:59:00.000+08:00

去吧無謂再停留
不須要解釋為何
不必再眼光柔柔

去吧無謂再回頭
不須理往昔如何
今天我要走難留

去留問題

2006-07-19T17:30:00.000+08:00

如果我決定去，是一個好容易的決定，但如果要留下，是好艱難，要有勇氣，要有更大的付出。

死?!

2006-06-20T23:05:00.000+08:00

親愛的寨主：

自從你將七姑遲退，本寨可望慢慢納入正軋，豈料你竟請來行為極似七姑的八姑娘，這又何苦？既生七姑，何生八姑娘？本寨正當用人之際，雖知蜀中無大將，大將又不為你所用，但家事國事，都不及人事，你又豈能請人當兒戲？你要知道，八姑娘為人心直、口直、腰直、頸直，又豈能將外務重責，放在她的肩上？雖然大姊經常無的放矢，又眼盲耳聾鼻痘炎，練精學懶衰到貼，但始終精通扭六壬，又不畏羅魂士陳，當日誓死相撲，自私自利，對付魚仔蝦毛等敗類，實在勝任有餘；二姊雖然行逕瘋癲，粗鄙不堪，經常以權謀私，濫權愛嫖，但亦勝任其職，多年來為你奔波勞碌；反觀八姑娘，唉，當日你萬中挑一，本以為此女不是有驚人藝業，亦會貌似西施，豈料．．．你知否像八姑娘此等一級貨式，只能放在凍肉櫃之內，?不能將之上?。否則，輕則令人吐血，重則傾你家園。若然不是事態嚴重，我又豈會以死相諫？難道我是一個會搗爛自己飯碗的笨賊嗎？

今日一書，不知可有機會繼續為你效勞，若然不幸被你激死，還望老闆你自己多多保重，唯才是用。

亞五書

合理時間

2006-06-19T10:08:00.000+08:00

雞毛話事人：亞英姐．．．
清潔亞姐：係，乜野事呢？
雞毛話事人：你可唔可以半夜十二點至黎清潔？因為你辦公時間會阻住我地工作。
清潔亞姐：．．．

憂鬱症!

2006-06-14T10:09:00.000+08:00

八妹，自從你上班後，坐在你身後的我，連觀看貼圖區的意欲亦大減了，這是否憂鬱症的先兆？

好心有錢人

2006-06-13T11:00:00.000+08:00

有些人天生有錢，又或者他們是靠自已辛苦賺來的，怎樣花費、怎樣揮霍、怎樣過著優質生活，當然有著絕對的自由，亦不需要向其他人交代。不過，在某大銀行的高層，花費一億元去學跳舞的同時，不知她心裡可有想過：社會上，有多少公公婆婆，還是靠著拾荒維生？有多少小朋友，即使一個月才吃一次麥當奴亦未能夠負擔得起？有多少人跌出了政府的藥物資助網，未能負擔昂貴的專科藥物，而要坐著等死？又有多少人，即使每天辛勤工作十二小時，仍然只能賺取那近乎可恥的微薄薪資，未能養妻活兒？
你比其他人努力，得到更大的回報，是理所當然的。本文亦無意抨擊任何享樂主義，非要搾取閣下之血汗金錢來接濟所有窮人。只是，忽然有感而發，人類互助互愛，到底是否只是政府用以愚民的一種教育手段？受過高等教育，身居要職，進身上流社會，是否就會接受另一種上流教育，用以洗清以往被蒙蔽的腦袋，讓你清楚明白，互助是謊言，互愛是廢話，只有金錢，才是人類一生值得追求的事物，只有個人享樂，才是人類的福祉所在？
政府曾拍過一段短片，宣傳口號為「求學不是求分數」。這不是愚民是甚麼？你要是沒有足夠分數，你不能繼續升學；你沒有大學學位，就連進身政府入職的最底要求也沒有，要是你真的不求分數，政府自已也不要你，你的將來，政府可不會來替你承擔。

家書 (二)

2006-06-12T11:52:00.000+08:00

因何你辦公?上的水樽，一天比一天的大？甚至已到了1.25公升的地步，你是否嚴重缺水了？

五哥

好橋?妖!

2006-06-07T19:38:00.000+08:00

老闆：我想你幫我度一條絕世好橋。
伙記（汗流浹背）：絕世好橋．．．？
老闆：冇錯！
伙記：咁．．．唔知係關於乜野既呢？
老闆：我要打低周仔！我唔再做人地做過既野，我要創新！我要橋！
伙記（兩眼發亮，似看見將來）：老闆英明！只有創新，先至可以領先人前！
老闆：冇錯！你快D比條橋我！
伙記：好，老闆，其實我有好多新橋絕橋！不如試下咁咁咁．．．（省略）
老闆（思考後，皺著眉）：咁樣．．．好似好冒險．．．仲有冇？
伙記：又不如咁咁咁．．．（省略）
老闆：?！唔知得唔得o個喎．．．仲有冇？
伙記：既然係咁．．．一於就咁咁咁．．．（省略）
老闆（拍?）：仆街！你到底諗清楚未呀！你想蝕晒我D錢呀！
伙記：．．．

當家前傳 Donga Begins

2006-06-06T22:32:00.000+08:00

二十年前，婚壇依然一片寧靜。

傑、洲本是同門師兄弟，兩師兄弟一同出生入死，經歷幾許風雨。

但，某年某月某晚，維港上空，兩顆耀眼的星宿劃天而過，分別墜落維港兩岸。

命中註定兩個只能活一個，如是者，在宿命的驅使下，兩師兄弟只能順應天命，斷絕同門關係，各自成立門派，於婚壇繼續叱吒風雲，一幕幕驚天地，泣鬼神的對決，由此展開。

所謂既生傑，何生洲？

家書

2006-06-06T20:08:00.000+08:00

八妹，

你好嗎？身體還好吧？記得當年你離家時，無神的雙目，拖著瘦小的身軀，背著一個小背包，左搖右擺地離開我們。你知道我們多麼惦念你？那時候，我們都很疼你的，你知道嗎？你那小小的軀殼裡，盛滿了我們家族的遺傳，每日都在歡樂中渡過，是不可或缺的一員。想不到，因為那一枚小小的郵票，及二姊為你送上的一條芥菜，你竟準時六點，拂袖而去。八妹，那可不是一家人相處之道啊！在家裡，當然要尊兄敬姊。六哥最討厭你那目中無人的態度，但他亦沒有哼過一聲，你記得嗎？跟你最要好、最疼你的七哥，雖然沒有投訴過你甚麼，但你看他緊皺著的眉心，你猜他會忍受你的自以為是而開心嗎？別以為大姊二姊很緊張你，才是對你最好的家人，她們兩人，人面獸心，直到了喪心病狂的地步啊！我可不是要說她們的長短，可是，我實在不願看見你跌進獸心洞，爸爸又甚麼都不管，我不提點你，誰來提點你啊？別以為我對你冷漠，便是對你不好。最低限度，我不會把你打進十八層地獄，將你放在油鍋裡滾啊。

五哥上

榮升當家

2006-06-05T11:19:00.000+08:00

時值初夏，紅雨警告。
大當家突召見，看似平靜的一天竟暗起波瀾。
大當家：「不經不覺，你加入本寨已兩年了，感覺如何？」
「唔......感覺良好。」
大當家：「哈哈哈，爽快！既然如此，當家也不妨直言。」
「當家請講。」
大當家：「本寨當家眾多，各有所長，你又可有打算，發揮所長？」
「小人哪有甚麼所長呢！能為大當家效犬馬之勞，已是小人無尚之福份矣，小人又豈敢多想。」
大當家：「你又何需妄自菲薄，無疑你處事確是幼嫩，但只要多多請教各當家，相信假以時日，你絕非池中之物。」
「小人定必多聽各當家教悔，以報大當家知遇之恩。小人告退......」
大當家：「且慢，尚有一好消息相告，你快將成為本寨之七當家，可喜可賀，哈哈......」
「當真？大當家如此厚禮，小人愧不敢當。」
大當家：「哈哈，好一句愧不敢當！不枉我如此器重你，哈哈哈哈......」
「....................................................」

風火連城

2006-06-02T17:05:00.000+08:00

今日本寨擺出空城計，唯有搵風火連城消磨一下。
本以為今天就此過，豈料大當家突現身，險給他殺個措手不及。
最後總算有驚無險，不知二三四五六當家可有受波及？

電話恐懼 (三)

2006-05-30T11:13:00.001+08:00

下屬：其實．．．個電腦有野彈出黎，係有好多原因．．．
老闆：咁係咪中毒？
下屬：有可能係中毒，亦有可能係有間諜－－（未講完）
老闆（煞有介事）：你話公司有間諜？咁你知唔知係邊個？
下屬（當堂呆左）：我唔係話有間諜－－（又未講完）
老闆（插口）：關門先！
下屬只好走去關門。
老闆（凝重地）：究竟係邊個？
下屬（冷汗直冒）：你所指既係．．．
老闆：間諜！
下屬（呆了一會，輕聲道）：你睇下出面邊個個樣似D？
老闆：間諜一般個樣都唔會似間諜！
下屬：老闆英明，個樣最唔似o個個就係。
老闆：你係話（眼睛望向最老的老女人臭八婆）佢？冇可能，佢跟左我十幾年，佢唔會出賣我！
下屬：唔係，佢個樣似一個間諜，所以唔係佢。
老闆：咁．．．唔通係（眼睛望向另一冇咁老的臭八婆）佢？都冇可能，佢係有做自己生意，不過佢都唔會出賣公司。
下屬：我都唔係話佢。
老闆：咁答案呼之欲出。咪即係（眼睛望向最似間諜的馬高）佢？會唔會係佢呢？佢個樣．．．
下屬：其實我都唔敢肯定係唔係佢。不過佢個樣最唔似間諜（口不對心）。
老闆（點下點下頭）：係囉，佢個樣雖然係（心存厚道，有講出口）．．．不過都應該唔係．．
隔了一會兒，老闆用凌厲的眼神看著下屬
老闆：原來係你！你點解要咁對我？
下屬（冷汗直冒）：其實，我入黎只不過係幫你睇下部電腦．．．

電話恐懼 (二)

2006-05-29T22:29:00.000+08:00

老闆（神色凝重）：我想問下．．．
下屬（戰戰競競）：係．．．
老闆：我部電腦係咁彈D野出黎，係乜野黎？
下屬：這個嘛．．．．

電話響起

2006-05-29T14:05:00.000+08:00

十時，電話響起，她在睇財經，她在火車站。
十一時，電話仍響起，她在渴牛奶，她在洗手間。
十二時，電話繼續響起，她在冥想，她在照鏡。
一時，電話依然響起，她、她在燒烤。

??餉店??????

2006-05-29T13:01:00.000+08:00

電話響了起來：「你入一入黎！」

你估下跟住係點？

illy! (結局)

2006-05-19T13:47:00.000+08:00

見倒呢種咁有格調既廁所，真係小便都舒服過人，走返出去，諗住同老婆講呢度D裝修有幾威水，叫佢即刻去小個便感受下。點知出到去，見倒檯面有碟細細既、兩人份量既Pizza同薯片，我就同老婆講：「唉，老婆，乜咁大駛？呢碟野起碼都要五草野啦！」

我老婆就好開心咁講：「佢話係『飛』架！」

「飛？飛你屎忽咩！食完曉飛呀？」我伸一伸手，好勞氣咁叫個侍應埋黎，指住碟野，問佢：「What? Why? Till....」

個侍應笑笑口，好有禮貌咁話：「Sir, it's free!」

我越聽越興，又Pizza，又薯片，酒吧都收你三四十蚊啦，你同我講自由！除非你同我講唔駛錢啦！冇咁易呃倒我！我耍手擰頭，同佢講：「拎番走啦！」

跟住佢竟然用D唔咸唔淡既廣東話同我講：「先生，送比你食架！」

我瞪大隻眼望住佢：「送既？你杯咖啡三十蚊，Pizza竟然係送既？」

佢點下點下個頭，o個陣時，我老婆已經將塊Pizza放入個口度。

個侍應笑住話：「食完出面仲有呀！」

妖！你識講廣東話你就早D講啦！

illy! (下)

2006-05-19T12:31:00.000+08:00

個男侍應笑笑口咁將一本封面有個半裸男，心口到肚池都生滿毛毛既雜誌放低！豈有此佢！畀埋呢D野我老婆睇，算點呀佢！我拎起本野，求其睇下，發現一個心理測驗，玩下先！結果係：我係一個工作至上既人，會搵倒錢，但唔會浪費金錢去享受，都幾準喎！我玩完個心理測驗，到我老婆玩，o個陣我先至發覺，杯野拎左黎咁耐，一啖都未飲過。唉，廿幾三十蚊一杯，唔好飲你就死！

飲左一啖，「Shit!」乜咁Q好飲？！每一啖，都有濃濃既咖啡味，不酸不苦，正所謂芳香馥郁，就係呢一隻。除左咖啡口感強烈，佢仲有一種好特別既味道，係我未曾試過既。普普通通一杯House coffee都咁好飲，加埋個環境裝修，難怪個價錢拾級而上。

我同我老婆，兩個人攤係張L形長長既梳化度，一路睇雜誌，一路嘆咖啡，不經不覺，竟然坐左兩個鐘頭。坐得耐，自然就會人有三急。我望下個侍應，佢又望住我，我望下自己細佬，佢就笑一笑，指我去餐廳盡頭右手邊既一扇門。我將門推開，入面黑麻麻，幾乎想走番出去，問佢係咪玩野，睇多兩眼，先至見倒男廁既標誌。唉，呢D先至叫做設計，同香港一般既餐廳的確係有分別，o個D係用氣味黎話畀你知廁所o係邊。

（待續）

illy! (上)

2006-05-19T11:29:00.000+08:00

尋日，忽然心癢癢，打電話畀Professor，叫佢幫我查下，中環係咪有間著名老牌意大利咖啡店。果然，佢搵左一陣，就打電話黎講：「喂，地址係雲咸街 33號，電話係......」當然，我冇抄底佢講o個個電話號碼就收左線。冇耐，亞Jack又打黎話：「你搵呢間咪我上次同你話好正o個間囉，係金鐘都有分店......」

卒之比我搵倒，我同老婆，戰戰競競咁走左入去，一入去，我當堂打左個突，「乜唔係咖啡店咩？」我同我老婆講。呢間，裝修直情係一間高級意大利餐聽。心諗：「呢舖送羊入虎口，唔夠一百都唔駛走！」原先只係諗住坐下飲下咖啡，應該貴極有限。

一位外籍女侍應?個餐牌埋黎，望住我，我心諗：「仲唔走開等派彩呀！」都冇同佢講野，費事我D牛津音一出嚇Q死佢。點知一睇個餐牌，係我畀佢嚇Q死，當堂衝口而出一句：「Shit!」餐牌上面寫滿英文字母，好彩我仲識串Coffee，淨係見倒乜Coffee，物Coffee，最平o個杯咖啡25蚊，一路上 $3x, $4x, $5x, $6x, $7x 都有。

同老婆商量左一陣，決定叫兩杯最平既，唔係話我地冇錢，有都唔駛叫畀佢睇，只不過我覺得...唉，算啦。

我同個侍應講：「Coffee! Cheap Coffe!」

佢on下on下咁，講左一大輪野，都唔知佢講乜，淨係聽倒甚麼Arabica beans。唉，睇黎佢唔多識講英文，係中環蘇豪區，唔識講英文點出黎做野呀！我都費事教精佢，唯有指畀佢睇我想飲乜。

過左一陣，有個好大隻既男侍應送兩杯野過黎，佢幾好，雖然睇佢個樣都唔多識講英文，但係佢好好笑容，所以我都冇準備為難佢。

等佢好有禮貌咁放低兩杯野之後，我老婆忽然同佢講：「Paper...paper」個侍應抓下個頭，好似聽唔明咁，真係十下十下，我就同佢講：「Book! You know?Book! Look look! Entertain!」佢忽然間又好似醒番D，就答話：「Oh! Magazine? Right?」

我冇佢咁好氣，就講：「知你就快D?黎啦！蠢過隻豬！」佢一邊走一邊：「OK! OK! Please wait.」

唉，冇佢修，如果唔係見佢咁有禮貌，真係要炳下佢至得！

（待續）

咁你又嘈?

2006-05-17T18:03:00.000+08:00

有人問我，既然你反對同D同事嘈，咁你又成日同同事嘈？佢一定係誤解左我既意思。
我意思係，我反對你地同人地嘈，遇著D仆街臭八婆，我一定同佢死過！有殺錯，冇放過！

正所謂，每個人心中，都有一個臭八婆！

嘈!

2006-05-17T11:23:00.000+08:00

我好反對o係公司同d同事嘈，有乜好嘈？嘈完之後，o係同事眼中，你係一個容易發脾氣又小器既人，o係上司眼中，你係一個難成大器既人，o係朋友眼中，佢地會話『又轉工？喂，你係咪撈架！』所以，我嚴重反對同同事嘈！